Кыргызстан менен Тажикстандын товар жүгүртүүсү үч эсеге өстү
Бишкекте өтүп жаткан БУУнун Борбордук Азия экономикалары үчүн атайын программасынын (СПЕКА) Экономикалык форумунун алкагында Кыргызстандын экономика жана коммерция министри Бакыт Сыдыков Тажикстандын экономикалык өнүгүү жана соода министри Абдурахмон Абдурахмонзода менен жолугушту. Бул тууралуу министрликтин басма сөз кызматы маалымдады.
Жолугушууда тараптар эки өлкөнүн соода-экономикалык кызматташтыгын кеңейтүү, товар жүгүртүүнү көбөйтүү жана транспорттук-логистикалык байланыштарды өнүктүрүү маселелерин талкуулашты.
Абдурахмон Абдурахмонзоданын маалыматына караганда, 2026-жылдын 9 айында Кыргызстан менен Тажикстандын ортосундагы товар жүгүртүү болжол менен 50 млн долларды түзгөн. Бул көрсөткүч өткөн жылдын ушул мезгилине салыштырмалуу үч эсеге көп.
Тажик тарап өз ара сооданы мындан ары көбөйтүүгө, транспорттук-логистикалык кызматташтыкты өнүктүрүүгө, анын ичинде Кытай — Кыргызстан — Өзбекстан темир жол долбоорунун алкагындагы мүмкүнчүлүктөрдү пайдаланууга кызыкдар экенин билдирди.
Бакыт Сыдыков Кыргызстан менен Тажикстандын соода жүгүртүүсүн мындан ары өстүрүү үчүн пайдаланылбай жаткан мүмкүнчүлүктөр арбын экенин белгиледи. Анын айтымында, бул мүмкүнчүлүктөрдү ишке ашыруу эки өлкөнүн экономикалык кызматташтыгына кошумча түрткү берет.
