Аял ишкерлерге 12%дык насыялар бериле баштады
“Ишкерликти өнүктүрүү фонду” аял ишкерлерге 12%дык жылдык үстөк менен кредиттерди берүү процессин баштаганын аталган фонд билдирди.
Ведомстводон белгилешкендей, финансы алууга өндүрүш жана кызмат көрсөтүү тармагында иштеп жаткан аялдар, ошондой эле негиздөөчүлөрүнүн 50%дан ашыгы аялдар болгон юридикалык жактар арыз берүүгө укуктуу. Каражат аймактардагы ишкерликти колдоого багытталган. Бишкек жана Ош шаарларында бул пайыздык ставка менен насыялар берилбейт.
Кредит алуу үчүн физикалык жактарда ишкердик патенти же жеке ишкер катары каттоосунун күбөлүгү болушу керек, ал эми юридикалык жактар үчүн мамлекеттик каттоо күбөлүгү талап кылынат.
Кредит 50 миң сомдон 3 миллион сомго чейин, 3 жылга чейин берилет жана жеңилдетилген мөөнөттү колдонуу мүмкүнчүлүгү каралган.
12% менен насыяларды берүү Азия өнүктүрүү банкы тарабынан аялдардын ишкерлигин кош каржылоо шартында өнүктүрүү үчүн бөлүнгөн 22 миллион сомдук жардамдын негизинде ишке ашып жатат. Ошондуктан фонд да өз каражатынан дагы 22 миллион сом бөлөт. Ошондо аялдар ишкерлигин колдоого бул жеңилдетилген программа боюнча жалпы 44 миллион сом бөлүнөт.
“Быйылкы жылы 10 ай ичинде 253 аял өз бизнесин өнүктүрүү жана кеңейтүү үчүн насыя алды. Аларга берилген жалпы насыялык сумма 478 млн 435,9 миң сомду түздү. Насыя алуу үчүн кызыккан жарандар колл-центрге 0559 956799 номери боюнча же фонддун расмий сайтында көрсөтүлгөн филиалдарына кайрыла алышат”, — делет маалыматта.
