Кыргызстан менен Пакистандын товар жүгүртүүсү былтыр 16,2 млн доллар болгон

Кыргызстан менен Пакистандын экономикалык кызматташтыгы чоң потенциалга ээ экенин “Кабар” агенттигине экономист Кубан Чороев билдирди.

Ал ​Пакистандан Кыргызстанга фармацевтика, кийим-кече, териден жасалган буюмдар, спорттук шаймандар, транспорт каражаттары, айыл чарба продукциялары (картошка, күрүч, чай, цитрус жемиштери) импорттолот.

Ал эми Кыргызстандан төө буурчак, эт консервалары, авиакеросин, дары-дармек, иштетилген тери, мониторлор, проекторлор, учак тетиктери экспорттолот. ​ Ошондой эле эки өлкө энергетика тармагында кызматташат. 

CASA-1000 долбоорунун алкагында эми Кыргызстанга Афганистан, Пакистан өлкөлөрүнө электр энергиясын экспорттоого чоң мүмкүнчүлүк түзүлөт. 

Серепчи ​Кыргызстан менен Пакистандын ортосунда кызматташуунун келечектүү багыттары – туризм, инвестиция тартуу, фармацевтика, билим берүү жана маданияттармагы, жогорку окуу жайлар, стандартташтыруу жана метрология экенине токтолду. 

Экономика жана коммерция министрлигинин маалыматы боюнча, Кыргызстан менен Пакистандын товар жүгүртүүсү 2024-жылы 16,2 млн долларды түзгөн, импорт – 14,2 млн доллар, экспорт – 1,9 млн доллар. 2020-2024-жылдары соода алакасы 2,3 эсеге жогорулаган.