Элкарт менен Aлипей + Шанхайда биринчи тесттик сыноо төлөмүн жүргүздү
Банктар аралык процессинг борбору (Элкарт улуттук төлөм системасынын оператору) жана Aлипей+ эл аралык платформасы Алипей+/ELQR интеграциясынын алкагында биринчи тесттик транзакцияны ийгиликтүү өткөрдү. Сыноо Шанхайдагы Алипай+ кеңсесинде Банктар аралык процессинг борборунун төрагасы Алтымыш Туратбековдун Кытайга болгон иш сапарынын алкагында жүргүзүлдү.
Жолугушуу учурунда Aлипайга QR код менен төлөө тесттик сценарийи сыналып көрүлдү. Жыйынтыгы ийгиликтүү болуп, интеграциялоо иши активдүү жана планга толук ылайык жүрүп жатканын тастыктады. Кызматташтыктын бул жаңы этабы кыргыз жарандары жана өлкөгө келген коноктор үчүн санариптик төлөмдөрдүн жеткиликтүүлүгүн кеңейтүүгө мүмкүнчүлүк берет.
Банктар аралык процессинг борборунун төрагасы Алтымыш Туратбеков биринчи этапта колдонуучулар сатып алуулар жана кызмат көрсөтүүлөр үчүн Aлипай+ аркылуу QR кодду колдонуп тез, ыңгайлуу жана кошумча кадамдарсыз төлөй ала тургандыгын белгиледи. Экинчи этапта долбоор кеңейтилет жана төлөмдөр эки багытта тең кабыл алынат, бул QR төлөмдөрүнүн өз ара кабыл алынышын камсыздайт.
Эске салсак, сентябрь айында Кытайдын Шанхай шаарында Банктар аралык процессинг борбору жана Alipay+ өз ара түшүнүшүү жөнүндө меморандумга кол коюшкан.
Aлипай+ - Ant International компаниясынын эл аралык санариптик төлөмдөр платформасы болуп саналат. Ал дүйнөдөгү алдыңкы электрондук капчыктарды жана төлөм тиркемелерин бириктирет, 57 өлкөдө жана аймактарда иштейт жана он миллиондогон соодагерлерге кызмат көрсөтөт.
