Кыргыз-корей товар жүгүртүүсү жыл аягында 30%га көбөйүшү мүмкүн
2025-жылдын август айында президент Садыр Жапаров мамлекеттик-жеке өнөктөштүк үчүн инвестициялар боюнча жаңы мыйзамдарга кол койгонун 2025-жылдын 4-декабрында, керектөө товарлары боюнча корей-борбор азиялык экономикалык кызматташуунун ишкердик аянтчасында Улуттук инвестициялар агенттигинин директорунун орун басары Дамирбек Бикулов билдирди.
Анын айтымында, бул мыйзамдар инвесторлордун корголушун, тең укуктарды жана мамлекет менен бизнес ортосундагы өз ара аракеттенүүнүн ачык-айкын эрежелерин камсыздаган заманбап укуктук базаны түзөт.
“Приоритеттүү тармактарда иштеген инвесторлор үчүн кошумча жеңилдиктер каралган. Кыргыз-корей кызматташуусу туруктуу жана позитивдүү динамиканы көрсөтүп келет. 2024-жылдын декабрында президент Садыр Жапаровдун Корея Республикасына расмий сапары болгон, анын жыйынтыгында экономика, инвестициялар, туризм тармактарындагы кызматташууга багытталган 22 эки тараптуу документке кол коюлган.
Маанилүү багыт катары “Корея – Жибек жолу” демилгесинин жарыяланышы да болду, бул Корея менен Борбор Азия өлкөлөрүнүн ортосундагы кызматташууга жаңы мүмкүнчүлүктөрдү ачат. Ошондой эле 2026-жылы Корея Республикасында Борбор Азия мамлекет башчыларынын саммити өтөрү күтүлүүдө. Бул ири иш-чара узак мөөнөттүү өнөктөштүктү колдоо жана чыңдоонун стратегиялык маселелерин талкуулоого негизги аянтча болот”, – деп билдирди Бикулов.
Кыргызстан менен Кореянын товар жүгүртүүсүнө токтолгон ал, 2024-жылы бул көрсөткүч 455 млн доллардан ашканын айтты. Учурдагы жылдын алгачкы 6 айында көрсөткүчтөр өсүп, 2025-жылдын жыйынтыгында 2024-жылга салыштырмалуу товар жүгүртүүсү 30%га көбөйөт деп күтүлүп жатат.
“Түз инвестициялардын агымы да көрсөткөндөй, акыркы 5 жылда корей өнөктөштөрүнөн келген инвестициялар 3 эседен көп өстү. Бүгүн биз корей компаниялары Кыргызстанда өз долбоорлорун ийгиликтүү ишке ашырып гана тим болбостон, жаңы жумуш орундарын түзүүгө, капитал рыногун өнүктүрүүгө жана жаңы технологияларды киргизүүгө өнөктөш болушун көздөйбүз”, – деди ал.
