Питер Шифф менен Чанпэн Чжао талкуусунун кульминациясы кыргыз алтыны болду
Дубайда кечээ өткөн Binance Blockchain Week 2025 форумунда дүйнөлүк криптоиндустрияны таң калтырган окуя болду. Форумдун негизги— “Улуу дебат: биткоин токенизацияланган алтынга каршы” талкуусу учурунда Binance негиздөөчүсү Чанпэн Чжао Кыргызстанда өндүрүлгөн алтын уютмасын көрсөткөнүн Виртуалдык активдер жана блокчейн-технологияларды өнүктүрүү боюнча улуттук кеңештин катчылыгынын жетекчиси Фархат Иминов билдирди.
Талкууга финансы дүйнөсүнүн эки таасирдүү өкүлү — Euro Pacific Asset Management & Schiff Gold компанияларынын негиздөөчүсү, экономист Питер Шифф жана Binance башчысы Чанпэн Чжао катышты.
Питер Шифф өзүнүн сөзүндө салттуу активдердин артыкчылыгын белгилеп, алтын миңдеген жылдар бою өз наркын сактап келгенин, технологиялык тобокелдикке кабылбаганын жана ишенимдүү сактык инструменти бойдон каларын баса белгиледи.
Чанпэн Чжао талкуунун экинчи тарабы катары реалдуу активдерди санариптештирүү — токенизация технологиясынын революциялык ролуна токтолду. Анын айтымында, токенизация дүйнө жүзүндөгү колдонуучулар үчүн активдердин жеткиликтүүлүгүн, ликвиддүүлүгүн жана ачыктыгын камсыздайт.
Талкуунун кульминациясы Чжао сахнада Кыргызстандын алтын уютмасын көтөрүп чыгып, жаратылыш ресурстары менен блокчейн-технологияларды айкалыштыруу потенциалы жөнүндө айтканда болду. Анын айтуусунда, дал ушундай долбоорлор жергиликтүү активдерди дүйнөлүк рынокко чыгарып, инвесторлор үчүн жаңы мүмкүнчүлүктөрдү түзөт.
Панелдик талкуу форумдун экинчи күнүндөгү эң кызуу темалардын бири болуп, катышуучулар арасында чоң резонанс жаратты. Эксперттер бул талкуу финансылык системанын келечеги салттуу активдер менен токенизация технологияларынын өз ара аракеттешүүсүнүн күчөшүндө (синергия) деген трендди бышыктаганын айтышат.
