К.Ташиев ЦУМдун жанындагы жолду тарыткан конструкцияларды дароо бузуу тапшырмасын берди
Министрлер кабинетинин төрага орун басары – УКМКнын төрагасы Камчыбек Ташиев ЦУМдун жанында курулуп жаткан объектке келип, Old Bishkek долбоорунун жетекчиси Нариман Түлеевге долбоор анын эмес, шаардыктардын маселесин чечиши керектигин билдирди.
УКМКнын басма сөз кызматы билдиргендей, 8-декабрда Камчыбек Ташиев президент Садыр Жапаровдун тапшырмасы менен Чүй проспектинде жүргүзүлүп жаткан курулуш иштерин текшерип, жолдун боюнда жайгаштырылган жана кыймыл бөлүгүн тарыткан конструкциялар менен аялдамаларды дароо бузуу тапшырмасын берди.
Ал ошондой эле курулуш министрлигине, шаар мэриясына жана башка жооптуу жактарга борбордо транспорт кыймылы үчүн маанилүү болгон жолду тез арада калыбына келтирүү жана шаардыктар үчүн ыңгайлуу шарттарды түзүү боюнча көрсөтмө берди.
"Өз кезегинде курулуш компаниясынын жетекчилиги жолду калыбына келтирүү жана инфраструктураны тартипке келтирүү боюнча милдеттенмелерди өзүнө алып, иштерди мүмкүн болушунча кыска убакытта бүтүрөбүз деп убада беришти", — делет УКМКнын маалыматында.
