Быйыл дүйнө жүзү боюнча миллиардерлер саны 287 адамга көбөйдү
Быйыл дүйнөдө долларлык миллиардерлердин саны өткөн жылга салыштырмалуу 287 адамга көбөйгөнүн Швейцариянын UBS банкынын жаңы изилдөөсүнө таянып, Интерфакс жазды.
Буга чейин рекорд 2021-жылы катталып, 416 жаңы миллиардер пайда болгон. Быйыл дагы 91 адам 298 млрд доллар байлыгын мурастап, тарыхтагы жаңы рекордду жаратты. Ал эми, алдыдагы 15 жылда миллиардерлер өз мураскерлерине кеминде 5,9 трлн доллар калтырышы мүмкүн экендиги болжолдонууда.
Жалпысынан дүйнөдө 2 миң 919 миллиардер бар. Анын 2 миң 545и эркек жана 374ү аялдар. Алардын жалпы байлыгы бир жыл ичинде 13%га өсүп, 15,8 трлн долларга жеткен.
АКШ миллиардерлердин байлыгы боюнча алдыда турат. Алардын жалпы активдери 18%гаөсүп, 6,9 трлн долларды түздү. Өлкөдө миллиардерлердин саны дагы 89га көбөйүп, 924 адамга жетти. Жыл ичинде тизмеге 109 жаңы ат кирип, 18 адам чыгарылып салынган.
Миллиардерлердин байлыгы боюнча экинчи орунда Азия-Тынч океан аймагы турат - 4,2 трлн доллар, үчүнчү орунда Европа, Жакынкы Чыгыш жана Африка - 4,1 трлн доллар.
Өндүрүш тармагындагы миллиардерлер байлыгын 27,1%га көбөйтүп, 1,7 трлн долларга чыгарган. Бул суммадагы эң чоң үлүш дүйнөнүн эң бай адамы Илон Маскка таандык. Ошондой эле IT секторундагы миллиардерлердин активдери 3 трлн долларды, финансы секторунда – 2,3 трлн долларды, керектөө товарлары жана соода-сатык багытында – 3,1 трлн долларды түздү.
