Кытайда 156 млн доллар пара алган чиновник өлүм жазасына тартылды
Бүгүн таң эрте Кытайдын Тяньцзинь шаарындагы орто баскычтагы Экинчи элдик сот мурдагы China Huarong International Holdings компаниясынын башкы директору Бай Тяньхуэге чыгарылган өлүм жазасын аткарганын РИА "Новости" билдирди.
Тергөөнүн маалыматына ылайык, ал кызмат абалынан кыянаттык менен пайдаланып, үчүнчү тараптарга долбоорлорду жана корпоративдик финансылоону алууга көмөктөшкөн. Мунун ордуна ал жалпы 1,108 млрд юань (болжол менен 156 млн доллар) өлчөмүндө мыйзамсыз сый акы алган.
Өлүм жазасы 2024-жылдын май айында чыгарылган. Сот ошондой эле Бай Тяньхуэни саясий укуктарынан ажыратууну жана анын бардык жеке мүлкүн конфискациялоону өкүмдө көрсөткөн.
2025-жылдын февралында сот айыпталуучу тергөөгө көмөктөшкөнүнө жана башка кылмыштарды ачууга өбөлгө болгон маанилүү далилдерди бергенине карабастан аппеляциялык арызын четке каккан.
2022-жылы Си Цзиньпин коррупцияны "партиянын жашоо жөндөмдүүлүгүн коркунучка салган негизги залалдуу шишик" деп атаган жана "эң төмөнкү чыдамдуулук" принципин карманарын билдирген.
