Мал базарларга эми документсиз мал киргизилбейт
Айыл чарба министрлигине караштуу Ветеринардык жана фитосанитардык коопсуздук боюнча мамлекеттик инспекциясы мал базарларында жана ири чарбаларда көзөмөлдү күчөткөнүн ведомствонун басма сөз кызматы билдирди.
Маалыматка ылайык, базарларда бодо малдын кулак биркасынын, ал эми жылкыларда чибинин бар жогу текшерилет. Документсиз жаныбарлар соода аянтчасына киргизилбейт.
Эреже бузгандарга төмөнкүдөй айып пул каралган:
- физикалык жактар үчүн — 5 500 сом,
- юридикалык жактар үчүн — 17 500 сом.
Мындан тышкары, айдоочуларга коштоочу документтерсиз мал ташууга тыюу салынат.
"Адистер рейддерди жүргүзүп, түшүндүрүү иштерин жасап жатышат. Фермерлерге жана мал ээлерине ветеринардык күбөлүксүз мал алып келүүгө тыюу салынганын, бул жугуштуу оорулардын жайылышын алдын алуу үчүн маанилүү экенин эскертип жатышат", — деп билдиришти ведомстводон.
