Өлкө боюнча 246 жарактуу лицензиясы жок медициналык мекеме аныкталды
Министрлик өлкө боюнча жеке медициналык жана фармацевтикалык уюмдарда текшерүүлөрдү жүргүзгөнүн Саламаттык сактоо министрлигинин басма сөз кызматы билдирди. Бул иш-чаралар медициналык кызматтардын сапатын жана лицензиялык-уруксат берүү тармагындагы мыйзамдардын сакталышын күчөтүү максатында өткөрүлгөн.
Текшерүүлөргө "Лицензиялык-уруксат берүү системасы жөнүндө" жана "Жарандардын саламаттыгын коргоо жөнүндө" мыйзамдар негиз болгон.
Жалпысынан 541ден ашык жеке медициналык уюм текшерилип, алардын 246сы (45,5%) ишин жарактуу лицензиясыз жүргүзгөнү аныкталган. Лицензиясы бар 295 мекеменин ичинен 110унда лицензиялык талаптардын бузулганы ачыкка чыккан.
Анын ичинде төмөнкүдөй мыйзам бузуу фактылары катталган:
- лицензияда көрсөтүлбөгөн багыттар боюнча медициналык кызмат көрсөтүү;
- кызматкерлерде сертификаттардын, аттестациянын жана тиешелүү медициналык билимин жоктугу;
- медициналык дипломсуз адамдарды ишке тартуу;
- санитардык-эпидемиологиялык нормаларды жана инфекциялык көзөмөлдү сактабоо;
- медициналык шаймандарды талапка ылайык стерилизация кылбоо;
- дары-дармектерди жана медициналык буюмдарды, анын ичинде атайын көзөмөлгө алынган препараттарды туура эмес сактоо.
Аныкталган мыйзам бузуулар боюнча административдик чаралар көрүлдү. Жалпы айып пулдар 20 млн 740 миң сомдон ашып, 263 мекеменин иши убактылуу токтотулду. Ал эми лицензиясыз медициналык иш жүргүзүүгө байланышкан 246 факты укук коргоо органдарына юридикалык баа берүү жана чара көрүү үчүн жөнөтүлдү.
Министрлик белгилегендей, лицензиясы жок медициналык мекемелерге кайрылуу жарандардын ден соолугу жана өмүрү үчүн олуттуу коркунуч жаратат. Профилдик билими жана уруксаты жок адамдардын кызмат көрсөтүшү оор кесепеттерге, инфекцияларга, процедураларды туура эмес жасоого жана бейтаптарга зыян келтирүүгө алып келиши мүмкүн.
