Дүйнөлүк базарда күмүштүн бир унциясы 60,24 долларга чыкты
Дүйнөлүк базарда күмүштүн баасы кескин өсүп, бир унциясы 60,24 долларга жеткенин, кечээ баа дээрлик 3%га көтөрүлгөнүн Интерфакс билдирди. Ошол эле учурда алтын да кымбаттап, баасы 0,4%га өсүп, унциясы 4235,9 долларды түздү.
Адистер мындай өсүштү АКШнын Федералдык резерв системасы жакын арада негизги пайыздык ченди 0,25%га төмөндөтүшү мүмкүн деген күтүүлөр менен байланыштырып жатышат. Соодагерлердин эсебинде бул чечимдин кабыл алынышынын ыктымалдуулугу 89,6%.
Чендин төмөндөшү алтын менен күмүш үчүн жакшы белги. Айрым аналитиктер алтындын баасы дагы рекорддук көрсөткүчтөргө жетиши мүмкүн деп эсептешет.
Азыр рынокто 1 унция алтын сатып алуу үчүн 71 унция күмүш керек, ал эми октябрда бул көрсөткүч 82 унцияны түзгөн.
Инвестиция адистери белгилегендей, күмүш азырынча дагы кымбаттоо мүмкүнчүлүгүнө ээ. Себеби рынокто күмүш тартыш болууда. Эгер бул дефицит жоюлбаса, күмүштүн баасы мындан ары да өсө тургандыгы белгиленет.
