"Кристалл" заводунун айланасындагы уулу заттарды жоюуга МинКаб 92 млн сом бөлөт
Таш-Көмүрдөгү "Кристалл" аянтчасынан уулуу химиялык заттарды чыгаруу жана утилдештирүүгө МинКаб 92 млн сомго жакын каражат бөлө турган болду.
МинКабдын 2025-жылдын 8-декабрындагы №1073-т токтомуна ылайык, Жалал-Абад облусунун Таш-Көмүр шаарында жайгашкан "Кристалл" ишканасынын аймагынан уулуу химиялык заттарды чыгарып, утилдештирүүнүн биринчи этабына 91,9 млн сом каражат багытталат.
Документке ылайык, Өзгөчө кырдаалдар министрлиги "Кристалл" ААКнын аймагында сакталган коркунучтуу химиялык заттарды чыгаруу, өлкө аймагы аркылуу жана анын сыртында ташуу, зыянсыздандыруу жана утилдештирүү боюнча авариялык, биринчи кезектеги иш-чараларды аткарат.
Иштер эки этаптан турат:
– биринчи этап — 2026-жылдын 31-декабрына чейин;
– экинчи этап — 2027-жылдын 31-декабрына чейин.
Каржы министрлигине биринчи этап үчүн зарыл болгон 91,9 млн сомду өзгөчө кырдаалдардын алдын алуу жана кесепеттерин жоюу боюнча атайын эсептен бөлүү тапшырылды.
Жаратылыш ресурстары, экология жана техникалык көзөмөл министрлиги ӨКМге бардык жактан жардам көрсөтүүгө милдеттендирилди, ошондой эле 2026-жылы экинчи этапты каржылоо үчүн өзүнүн атайын эсебинен каражат карашы керек.
