"Кыргыз Көмүр": Ташуу, жүктөөдө бир аз майдалангандыктан кээде майда көмүр болуп калып жатат"
"Кыргыз Көмүр ишканасынын директорунун орну басары Рустамбек Садыралиев радио эфири аркылуу кыш мезгилинде көмүрдүн сапатына байланыштуу суроолорго жооп берди.
Анын айтымында, Кыргызстанда көмүр сатыкка чыгар алдында лабораториялык текшерүүдөн өтүп, мамлекеттик сертификаттарды алат.
"Эгер көмүр сапатсыз, тапсыз болсо же экологияга зыяндуу болсо, албетте, мамлекет же тиешелүү мамлекеттик органдар аны сатууга уруксат бербейт", — дейт ал. Буга ула ал Кара-Кече кенинин көмүрү бардык мамлекеттик стандарттарга жооп берерин жана сатууга уруксаты бар экенин кошумчалады.
"Бул жагынан эч кандай зыян жок. Аны толук түрдө үй шартында да, коммерциялык максатта да колдонсо болот", — деди компания өкүлү.
Ал кээде кардарларга майда фракциядагы көмүр келип жатканынын себебин, көмүрдүн табигый жайгашуусу, ошондой эле жүктөө жана ташуу процесстеринде көмүрдүн упуранышы менен түшүндүрдү.
"Биз ар бир кардарга жакшы, сапаттуу көмүр жетүүсүн каалайбыз. Бирок майда көмүр да — көмүр. Ташууда ал бир аз майдаланат. Ошондуктан ташылып келген көмүрдүнг арасында анча-мынча майда көмүр болуп калып жатат, — дейт ал.
