“Кыргызкөмүр” быйыл 1 млн 209 миң тонна көмүр өндүрдү
“Кыргызкөмүр” мамлекеттик ишканасы жергиликтүү кеңештер менен биргеликте жалпы 138 социалдык көмүр кампа ачканын “Кыргыз көмүр” мамлекеттик ишканасынын директорунун орун басары Рустамбек Садыралиев “Биринчи радионун” түз эфиринде билдирди.
"Бишкектеги социалдык кампаларда Кара-Кече көмүрүнүн бир тоннасы 5 миң 800 сом. Ал эми ар бир облуста, аймакта өзүнчө баалар коюлган. Быйыл, 2025-жылдын башынан бери “Кыргызкөмүр” мамлекеттик ишканасы 1 млн 209 миң тонна көмүр өндүрдүк. Азыр ушул көмүрдү өзүбүздүн кардарларга берип жатабыз",-дейт ал.
"2025-2026-жылдардагы күз-кыш мезгилине даярдык жөнүндө өкмөттүн токтому май айында кабыл алынган. Ал жерде “Кыргызкөмүр” ишканасынан тышкары Министрлер Кабинети, мамлекеттик органдар, жергиликтүү бийлик, “Кыргыз темир жолу”, ЖЭБ жана башка ишканаларга тиешелүү пландар иштелип чыгып, ар бирине өзүнүн тапшырмалары дайындалган. Бардыгы биригип кышка даярдык иштерин жүргүзүп келишти”, - деди Садыралиев.
Белгилей кетсек, Кыргызстанда 48-50 ар кандай көмүр казган ишканалар болсо, алардын бири “Кыргызкөмүр” ААКсы.
Кара-Кече кенинен казып алынган көмүр Ысык-Көл, Нарын, Чүй облустары жана Бишкек шаары, андан тышкары Токтогул, Суусамырдан Таласка чейин тарайт.
