Кыргызстанда 1991-жылдан бери алынган гранттар жана алына турган гранттар терең анализденет
Президент Садыр Жапаров 4-декабрда Кыргызстан үчүн эл аралык гранттык жана техникалык жардамдын координациясын жана мониторингин күчөтүүгө, ошондой эле аны улуттук өнүгүү приоритеттерине шайкеш келтирүүгө багытталган расмий тапшырмага кол койду.
Документте төмөнкүлөр бекитилген:
- эл аралык гранттык жана техникалык жардам долбоорлорун тандап алуу жана жактыруу боюнча Комиссиянын курамы;
- өлкөдөгү мындай жардамды координациялоо жөнүндө жобо;
- Комиссиянын ишинин регламенти.
Комиссия катчылыгынын функциялары экономикалык алдын ала божомолдоо боюнча ыйгарым укуктуу мамлекеттик органга жүктөлдү. Ага Комиссиянын ишин уюштуруучулук жактан камсыз кылуу жана долбоордук сунуштарды улуттук деңгээлдеги стратегиялык документтерге ылайыктыгын алдын ала текшерүү милдети тапшырылды.
Эл аралык гранттык жана техникалык жардам алган мамлекеттик органдар, министрликтер, ведомстволор жана региондук түзүмдөр ал жардамдарды тартуу боюнча бардык сунуштарды Комиссиянын секретариатына жөнөтүүгө милдеттүү. Жогорку Кеңешке жана сот органдарына да ушундай тартипте иш алып баруу сунушталды.
Мындан тышкары, мамлекеттик органдар жана мекемелер 6 айдын ичинде 1991-жылдан бүгүнкү күнгө чейин ишке ашырылган эл аралык гранттык жана техникалык жардам долбоорлору боюнча маалыматты Экономика жана коммерция министрлигине бериши керек.
Эл аралык уюмдардын өкүлчүлүктөрүнө үч айлык мөөнөттө тиешелүү маалыматты Кыргызстандын мамлекеттик органдарына жөнөтүү сунушталды, ал эми Тышкы иштер министрлигине бул маалыматтарды ыкчам алууга көмөктөшүү тапшырылды.
Экономика жана коммерция министрлигине, Санариптик өнүктүрүү жана инновациялык технологиялар министрлиги жана "Кызмат" мамлекеттик мекемеси менен биргеликте, чогултулган маалыматтарды 1991-жылдан тартып бүгүнкү күнгө чейин санариптештирүү милдети алты айлык мөөнөттө жүктөлдү.
Комиссиянын чечимдери эл аралык гранттык жана техникалык жардамды тартууда милдеттүү экендиги белгиленди. Ошондой эле МинКаб өз чечимдерин ушул документке ылайык келтирүүгө тийиш.
