Россия Кыргызстандан товарларды кабыл алууда жөнөкөйлөштүрүлгөн тартиптин мөөнөтүн узартты
Россиянын президенти Владимир Путин Казакстан жана Кыргызстан аркылуу автоунаа транспорту менен ташылган товарларды жөнөкөйлөштүрүлгөн тартипте кабыл алуу мөөнөтүн 25-декабрга чейин узарткан жарлыкка кол койду.
Расмий укуктук актылар жарыяланган сайтка жайгаштырылган документте 2025-жылдын 24-октябрындагы №778 жарлыкка өзгөртүү киргизилгендиги, анда мурда 10-декабрь деп көрсөтүлгөн дата жаңыртылганы белгиленет.
Өзгөртүүлөр президент кол койгон учурдан тартып күчүнө кирет жана Россия–Казакстан чек арасындагы жеңилдетилген бажы процедураларынын улантылышын камсыздоого тийиш.
Эске салсак, ЕАЭБ товарларды маркировкалоо боюнча пилоттук долбоорду сынап көргөн. Бул система мүчө мамлекеттерге продукциянын кыймылын, анын келип чыгышын жана өзгөчөлүктөрүн кошумча процедураларсыз көзөмөлдөөгө мүмкүнчүлүк берет. Сентябрь айынын аягында Россиянын премьер-министри Михаил Мишустин система биримдик аймагында толук масштабдуу ишке кирүүгө даяр экенин билдирген. Бул чечим Минскидеги өкмөт башчыларынын жыйынында бекитилген.
