Кыргызстан ишкерлери келечекте Иркутск облусунун компаниялары менен кызматташат
Кыргызстан жана Өзбекстандан келген ишкерлердин катышуусундагы реверстик бизнес-миссия Орусиянын Иркутск шаарында болуп өткөнүн Иркутск облусунун губернаторунун басма сөз кызматы билдирди.
Иш-чара "Натыйжалуу жана атаандаш экономика" аттуу улуттук долбоордун алкагында уюштурулуп, Иркутск облусунун бизнеси менен Борбор Азия өлкөлөрүнүн компанияларынын ортосунда жаңы өнөктөштүктөрдү түзүүгө багытталган.
Кыргызстан жана Өзбекстан делегациясына азык-түлүк жана ичимдиктер өндүрүшү, курулуш материалдары жана металл конструкциялары, өнөр жай жана тоо-кен жабдууларын чыгаруу, ошондой эле токой чарба жана жыгач иштетүү тармактарындагы компаниялар кирди. Иркутск облусунан ушул эле тармактар боюнча 30дан ашык компаниянын өкүлдөрү катышты.
"Иркутск облусу быйыл 90дон ашык өлкө менен кызматташты. Өзбекстан жана Кыргызстан менен болгон кызматташтыктын үлүшү азырынча чоң эмес, бирок биз келечектеги өнүктүрүү мүмкүнчүлүктөрүн көрүп турабыз, айрыкча машина куруу, агрардык өнөр жай тармактарында. Өкмөт, экономика жана өнөр жай министрлиги ачык диалогго даяр. Бул жолугушуу өлкөлөрүбүздүн ортосунда жаңы ишкердик мамилелердин башаты болот деп ишенебиз", - дейт Иркутск облусунун экономика жана өнөр жайды өнүктүрүү министринин милдетин аткаруучу Виктор Цишковский.
"Мой бизнес" борборунун директору Диляра Окладникованыын айтымында, Россия, Кыргызстан жана Өзбекстанды жалпы тарых жана тил бириктирет. "Бул конструктивдүү диалог курууда чоң роль ойнойт. Иркутск облусунун ишкерлери КМШ өлкөлөрүндөгү кесиптештери менен узак мөөнөттүү, өз ара пайдалуу мамилелерди түзөрүнө ишенем",-дейт ал.
