Өзбекстанга 11 айда 10,7 млн турист кирип, туристтик кызмат экспорту 4,4 млрд долларды түзгөн
Өзбекстандын туристтик сектору туруктуу жана жогорку темпте өнүгүп жатканын Туризм боюнча мамлекеттик комитетинин басма сөз кызматы кабарлаган.
Маалыматта, 11 айда өлкөгө 10,7 млн чет элдик турист келсе, алардын ичинен дээрлик 3 миллиону Кыргызстандан келгени айтылат. Бул көрсөткүч өткөн жылдын тийиштүү мезгилине салыштырмалуу 114%га көп. Туристтик кызматтардын экспорту 4,4 млрд долларын түзүп, 144%дык өсүшкө жеткен.
Ошондой эле "Өзбекстанды кыдыр" программасынын алкагында жарандар 23,7 млн ички сапар жасаган. Бул пландын 114,8%га аткарылганын билдирет. Өлкө аймактарында 954 жаңы мейманкана жана жайгашуу объектиси пайдаланууга берилген. Натыйжада мындай объектилердин жалпы саны 6 861ге, номердик фонд 183,9 миң орунга жетти.
Тармактагы ишкердик да кеңейип, быйыл 662 жаңы компания жана турагенттик ачылып, туристтик кызмат көрсөтүүчү субъектилердин жалпы саны 4 348ге жеткен. Гид-экскурсоводдордун саны 4 345ке жетип, быйыл кошумча 375 адис даярдалган.
Ишкерлерге берилген сунуштардын негизинде 784 санитардык-гигиеналык пункт иретке келтирилген. Инвестициялык чөйрөдө 421 долбоор ишке ашырылып, алардын алкагында 6 313тен ашуун жаңы жумуш орду түзүлгөн.
