Евробиримдигинде 10 жыл ичинде импорттолгон товардын көлөмү 100 млрд долларга жеткен
Акыркы он жыл ичинде Евразия экономикалык биримдигинде импорттолгон сооданын көлөмү эки эсеге өсүп, 100 миллиард долларга жеткен. Ошол эле учурда биримдик ичиндеги сооданын үлүшү 15 пайыз деңгээлинде калган. Кыргызстан үчүн өз ара сооданын 98%ы Россия менен Казакстанга туура келет. Бул тууралуу министрлер кабинетинин төрагасы Адылбек Касымалиев Москвадагы биримдиктин Өкмөттөр аралык кеңешинин жыйынында сүйлөп жатып билдирди.
Ал ошондой эле Кыргызстан менен Армения жана Беларус ортосундагы соода потенциалы жетиштүү ачыла электигин айтты. Өз ара сооданын түзүмүн кеңейтүү, технологияларга жеткиликтүүлүктү күчөтүү жана заманбап өндүрүш чынжырларын түзүү зарылдыгы белгиледи. Илимий-техникалык кызматташтыктын жана инновацияларды киргизүүнүн маанилүүлүгү да баса белгиленди.
Ички транспорттук коридорлор жана бажы пункттарынын өткөрүү жөндөмүн жогорулатуу экономикалардын туруктуулугу үчүн негизги факторго айланып баратканын Адылбек Касымалиев кошумчалады.
Анын маалыматына караганда, ЕАЭБде электрондук сооданы өнүктүрүү боюнча жол картасы жана Бажы кодексине өзгөртүүлөр боюнча иш уланууда. Учурдагы нормалар өсүп жаткан электрондук сооданын өзгөчөлүктөрүн, анын ичинде салык салуу маселелерин жана маркетплейстер аркылуу жөнөтүлгөндө алуучуну аныктоо тартибин эске албайт. Бул маселелерди ЕЭКке дыкат карап чыгуу сунушталды.
ЕАЭБдин жалпы рыногунун эффективдүүлүгүн арттыруу жана төрт эркиндикти — товарлардын, кызматтардын, капиталдын жана эмгек күчүнүн эркин кыймылын камсыз кылуу зарылдыгы баса белгиленди. Министрлер кабинетинин төрагасы ишкерлер биримдиктин бардык аймагында бирдиктүү эрежелерге жана унификацияланган процедураларга жеткиликтүү болушу керек экенин айтты.
