"Мээнет" чарбасы 120 гектар жерди ийгиликтүү иштетип жатат
Суу ресурстары, айыл чарба жана кайра иштетүү өнөр жайы министрлиги ишке ашырып жаткан 30+20+10 долбоору аймактарда реалдуу натыйжаларды берүүдө. Анын ийгиликтүү мисалдарынын бири — Ысык-Ата районунда жайгашкан “Мээнет” дыйкан чарбасы.
“Мээнет” чарбасы 120 гектар айдоо аянтына ээ. Анын 70 гектары сугат, 50 гектары кайрак жер. Чарбада Т-150, МТЗ-80 тракторлору, Е-281 жана Е-303 комбайндары, кампа иштеп турат. Негизги багыт — көп жылдык чөптөр, буудай жана арпа.
Министрликтин өсүмдүк өстүрүүнү жакшыртуу жана ресурстарды үнөмдөө багытындагы 30+20+10 долбоору учурда чарбада активдүү ишке ашууда. Долбоордун алкагында төмөнкү багыттар боюнча практикалык жардам көрсөтүлүүдө:
- өсүмдүктөрдү туура тандоо,
- туура үрөн сортторун сатып алуу булактары,
- жер семирткичтердин көлөмүн так эсептөө,
- топурактын анализин жүргүзүү жана жыйынтыгын түшүндүрүү,
- тамчылатып жана жамгырлатып сугаруу системаларын колдонуу,
- нымдуулукту топтоо жана кургакчылыкка туруктуу технологиялар боюнча кеңештер.
Министрлик белгилегендей, быйыл суунун аз болушу күтүлүүдө, ошондуктан чарбага сууну үнөмдөөчү ыкмалар өзгөчө сунушталууда. Топурактын нымын сактоо, ысыкка чыдамкай сортторду тандоо боюнча адистер тарабынан үзгүлтүксүз консультациялар жүрүүдө.
Бекжан Бообеков белгилегендей, долбоор чарбанын өндүрүмдүүлүгүн арттырып, туура агротехникалык чечимдерди кабыл алууга чоң жардам болууда. “Биз үчүн бул долбоор – практикалык колдоо жана жаңы технологияларга өтүүнүн мүмкүнчүлүгү”, — дейт чарба жетекчиси.
