11 айда 13 келишим түзүлүп, 3,8 млрд доллардан ашык инвестиция тартылды
2025-жылдын 11 айынын ичинде жалпы 13 келишимге кол коюлуп, анын негизинде 3,8 млрд доллардан ашык жеке инвестиция тартылганын "Инвестициялык вектор: мамлекет жана бизнес" форумунда Президентке караштуу Улуттук инвестициялар агенттигинин директору Равшан Сабиров билдирди.
Анын айтымында, мамлекеттик-жеке өнөктөштүк (МЖӨ) алкагында ишке ашырылып жаткан долбоорлордун негизинде Кыргызстан 68-орундан 22-орунга чейин көтөрүлүп, жалпы суммасы 434 млрд сомдон ашкан 90дон ашык долбоордон турган портфель түзүлгөн.
Ал белгилегендей, Кыргызстандын эркин экономикалык зоналары (ЭЭЗ) инвестиция тартууну жана өндүрүштү өнүктүрүүнү ийгиликтүү улантып жатат. 2022-жылдан 2025-жылдын сентябрына чейин бул зоналарга 5,1 миллиард сомдон ашык инвестиция тартылып, бюджетке түшкөн кирешелер 10 миллиард сомдон ашты.
"Бүгүнкү күндө 330дон ашык ишкана иштеп жатат. Алардын катарында өлкөнүн экспорттук мүмкүнчүлүктөрүн бекемдеген технологиялык өндүрүштөр жана импортту алмаштыруучу өндүрүштөр бар. Жаңы индустриалдык кластерлер жана өндүрүштүк парктар түзүлүп жатат. Салыктык жеңилдиктер жана жөнөкөйлөштүрүлгөн жол-жоболор ЭЭЗдерди бизнес үчүн жагымдуу кылууда", — деп кошумчалады Равшан Сабиров.
