2026-жылы 5 миң гектардан ашык аянтка тамчылатып сугаруу системалары орнотулат
2026-жылга карата республикалык бюджеттин эсебинен 5 миң 270 гектар айыл чарба жерлерине тамчылатып жана чачыратып сугаруу системаларын орнотуу пландалып жатканын Суу ресурстары, айыл чарба жана кайра иштетүү өнөр жайы министрлиги маалымдады.
Министрликтин маалыматына ылайык, 2024–2025-жылдары суу үнөмдөөчү сугаруу системалары жалпы 2 миң 369,5 гектар аянтка орнотулган. Анын ичинен:
641,5 гектарга — тамчылатып сугаруу,
1 миң 728 гектарга — чачыратып сугаруу системалары туура келет.
Бул иштер министрликтин ушул жылдын 16-октябрындагы "Суу үнөмдөөчү технологияларды киргизүү жөнүндө" буйругунун негизинде жүргүзүлүп жатат. Аталган буйрукта мамлекеттик жер фондусундагы жерлерге заманбап сугаруу системаларын жайгаштыруу, участокторду аныктоо жана аларды убактылуу пайдаланууга берүү каралган.
Учурда республика боюнча 2 миң гектар жер белгиленип, 1,5 миң гектар аянтка сугаруу системаларын орнотуу боюнча тендерлер жарыяланды. Ошондой эле тиешелүү долбоордук-сметалык документтер даярдалды.
