Бишкекте робототехника боюнча регионалдык чемпионат болду
13–14-декабрда Бишкек шаарындагы Maarif мектебинин базасында Европа биримдиги тарабынан каржыланган Connectivity долбоорунун алкагында FIRST Bishkek 2025 робототехника боюнча регионалдык чемпионат өткөрүлдү.
Иш-чарага Ысык-Көл, Нарын, Чүй облустарынан жана Бишкек шаарынан, ошондой эле Казакстандын мектептеринен келген 350дөн ашык окуучу катышты.
Окуучулар STEAM багыттары, инженерия, программалоо жана робототехника жаатындагы өздөрүнүн билимдерин жана практикалык көндүмдөрүн көрсөтүүгө мүмкүнчүлүк алышты.
Чемпионаттын алкагында командалар төмөнкү үч категория боюнча таймашты:
- FLL Explore (7–10 жаш);
- FLL Challenge (10–13 жаш);
- FTC (14–17 жаш).
FIRST Bishkek 2025 чемпионаты Кыргыз Республикасында инклюзивдүү жана инновациялык билим берүүнү колдоого, ошондой эле XXI кылымдын компетенцияларын, анын ичинде санариптик жана экологиялык көндүмдөрдү өнүктүрүүгө багытталган Европа биримдигинин аракеттеринин бир бөлүгү болуп саналат. Мелдештин жеңүүчүлөрүнүн арасында төмөнкү окуу жайлардын окуучулары бар:
- Кара-Балта шаарындагы №6 орто мектеп;
- Нарын шаарындагы Чкалов атындагы №2 орто мектеп;
- Балыкчы шаарындагы Л. Толстой атындагы №1 орто мектеп;
- Бишкек шаарындагы №5 орто мектеп;
- "Маариф" жана "Эпсилон" мектептери.
