Кыргызстанда PMI индекси экономиканын оң нукта өнүгүп жатканын көрсөттү
Кыргызстанда “Кепилдик Фонду” ААКсы жана Финансы министрлиги тарабынан ишкердик жигердүүлүгүнүн индекси (PMI) боюнча кезектеги изилдөө жүргүзүлдү. Бул тууралуу “Кепилдик Фондунун” маалымат кызматы кабарлады.
PMI индекси экономиканын учурдагы абалын реалдуу убакыт режиминде баалоого мүмкүндүк берген негизги көрсөткүчтөрдүн бири болуп саналат. Анын жыйынтыктары ишкерлер, аналитиктер жана мамлекеттик органдар үчүн маанилүү маалымат булагы катары кызмат кылат.
Изилдөөгө өлкөнүн бардык аймактарынан чакан, орто жана ири бизнести өкүлчүлүк кылган 946 ишкер катышты. Респонденттердин 83%ы Талас, Баткен, Нарын, Жалал-Абад, Ысык-Көл, Чүй жана Ош облустарынан болсо, 17%ы Бишкек жана Ош шаарларынан болду. Тармактык түзүмдө айыл чарба (45%), соода (21%), кызмат көрсөтүү (16%), өнөр жай (8%), транспорт (5%) жана курулуш (5%) тармактары басымдуулук кылды.
PMI индекси алты негизги компоненттин негизинде эсептелет. Алар — жаңы буйрутмалар, өндүрүш көлөмү, иш менен камсыз кылуу, жеткирүү мөөнөттөрү, кампа запастары жана каржылык шарттар. Индекстин 50 пункттан жогору болушу ишкердик активдүүлүктүн өсүшүн, ал эми 50 пункттан төмөн болушу анын төмөндөшүн билдирет.
2025-жылдын октябрь айынын жыйынтыгы боюнча PMI 58,5 пунктка жетип, Кыргызстандын экономикасында оң динамика сакталып жатканын көрсөттү.
Белгилей кетсек, буга чейин “КФ” ААКсы жана Финансы министрлиги тарабынан 2024-жылдын октябрь айында жана 2025-жылдын март айында да PMI индекси боюнча изилдөөлөр жүргүзүлгөн.
Ал эми PMI индекси өлкөлөр боюнча көрсөткүчтөрү боюнча толук маалыматты "Кепилдик Фондунун" сайтынан таанышууга болот.
