Дүкөндөрдө ширелер жана "шире эмес" суусундуктар өз-өзүнчө жайгаштырылат
МинКаб 2014-жылдын 30-сентябрындагы №560 "Кыргыз Республикасынын аймагында соода ишмердүүлүгүн тартипке келтирүү жөнүндө" өкмөттүн токтомуна өзгөртүүлөрдү киргизүү тууралуу токтомдун долбоорун коомдук талкууга чыгарган. Долбоор сооданын айрым түрлөрү боюнча эрежелерге өзгөртүүлөрдү киргизүүнү сунуштайт.
Тактап айтканда, соода субъекттери табигый ширелерди жана шире камтыган суусундуктарды өзүнчө — ар башка витриналарда, текчелерде же атайын бөлүнгөн соода аймактарында жайгаштырууга милдеттүү болот.
Бул чаралар Евразия экономикалык биримдигинин техникалык регламентинин талаптарына ылайык, товарларды так физикалык ажыратууну камсыз кылууга багытталган.
Мындан тышкары, шире продукциясы жайгашкан ар бир соода аймагында товарлардын курамы тууралуу так жана оңой окулуучу маалымат берилүүгө тийиш. Анын ичинде шире камтыган суусундуктарда шире компоненттеринин бар экендиги сөзсүз көрсөтүлүшү керек.
Ошондой эле долбоордо ата мекендик өндүрүштөгү товарларды жайгаштырууга карата жаңы талаптар каралган. Соода залдарынын аянты 50 чарчы метрден жогору болгон дүкөндөрдө кыргызстандык продукциялар үчүн өзүнчө текчелер же стеллаждар бөлүнүп, анда продукциянын келип чыккан өлкөсү "Органика" деген шелфтокер менен белгилениши сунушталууда.
Ал эми аянты 200 чарчы метрден жогору болгон дүкөндөрдө ата мекендик товарлар сатылган жайлардын үстүнө тиешелүү белгилери бар жеңил жарнамалык конструкциялар орнотулушу керек.
Мындан тышкары, 200 чарчы метрден ашкан соода залдарында сатып алуучулардын көңүлүн буруу үчүн "Органика" деген маалыматтык көрсөткүчтөрдү, жазууларды, шелфтокерлерди жана баннерлерди кошумча жайгаштыруу да каралууда.
