Нарын шаарында көмүрдү кымбат сатууну көздөгөндөр кармалды
УКМКдан билдиришкендей, 8-декабрда УКМК Монополияга каршы кызматтын аймактык бөлүмү жана Нарын шаардык мэриясынын кызматкерлери менен биргеликте Кара-Кече кенинен (108 тонна) көмүр жүктөлгөн 6 жеке жүк ташуучу унааны кармаган. Алар көмүрдү Нарын шаарында жогорулатылган баада (тоннасына 6000 сом) сатууну пландап жатышкан.
Аталган унааларга Ак-Талаа районунун Тоголок-Молдо айыл аймагынан берилген ишеним каттын негизинде "Кара-Кече" кенинде көмүр жүктөлгөндүгү жана көмүрдү аталган райондун аймагында жайгашкан отун базаларына түшүрүүгө тийиш экендиги аныкталган.
Мындан улам мыйзам бузууга жол берген күнөөлүү адамдар, тактап айтканда, Т.Молдо айыл өкмөтүнүн башчысы А.А.га "катуу сөгүш", Ак-Талаа районунун акиминин орун басары Ж.У.га "эскертүү" берилип, ал эми көмүр жүктөөгө ишеним кат берген айыл өкмөттүн адиси А.М. кызматынан бошотулду.
УКМК тарабынан көрүлгөн чаралардын натыйжасында айрым райондордо көмүрдүн баасы төмөндөтүлдү.
Мисалы, Кочкор районунда тоннасына 5100 сомдон 4000 сомго чейин, Нарын шаарында жана Ат-Башы районунда 6000 сомдон 5500 сомго чейин (Кара-Кече кенинен алынган көмүр үчүн) жана 5000 сомдон 4500 сомго чейин (Турук кенинен алынган көмүр үчүн) төмөндөдү.
