Тигүүчүлөр үчүн киреше салыгы жана камсыздандыруу төгүмдөрү азаябы?
Кыргызстанда тигүү тармагында иштеген кызматкерлер үчүн киреше салыгынын жана камсыздандыруу төгүмдөрүнүн ставкаларын төмөндөтүү боюнча мыйзам долбоору даярдалганын Мамлекеттик салык кызматынын төрагасынын орун басары Кубанычбек Ысабеков радионун түз эфиринде билдирди.
Анын айтымында, демилге президенттин тапшырмаларынын алкагында ишке ашырылып, иш менен камсыздоону "ачыкка чыгарууга" жана экспортту колдоого багытталган. Ошондой эле ал тигүү тармагы салыктык кирешелердин булагы катары гана эмес, миңдеген адамдар иштеген маанилүү социалдык сектор катары да караларын белгиледи.
"Расмий маалыматтарга ылайык, салык жана камсыздандыруу төлөмдөрүнүн базасында киреше салыгын жана камсыздандыруу төгүмдөрүн үзгүлтүксүз төлөп келген 9 миңге жакын кызматкер катталган", — деп билдирди Салык кызматынын төрагасынын орун басары.
Даярдалган мыйзам долбоору тууралуу сөз кылып, ал киреше салыгын эң төмөн деңгээлде — орточо эмгек акынын 1%ы өлчөмүндө белгилөө пландалып жатканын айтты. Эсептөөлөр боюнча, бул сумма 2026-жылы 440 сомду түзөт.
"Камсыздандыруу төгүмдөрү боюнча мурда ставкасына таасир эткен 50 кызматкердик босогону жоюу сунушталууда жана кызматкерлердин санына карабастан бардык тигүү цехтери үчүн 2 200 сом өлчөмүндө бирдиктүү төлөм киргизилет. Жалпысынан киреше салыгы менен камсыздандыруу төгүмдөрүн кошкондо төлөмдөр болжол менен 2 700 сомду түзөт", — деп кошумчалады Ысабеков.
Анын маалыматына ылайык, мыйзам долбоору даярдалып, мамлекеттик органдар жана бизнес өкүлдөрү менен макулдашылып, Президенттин администрациясына киргизилди. Кийинки этапта документти Жогорку Кеңешке жөнөтүү пландалууда.
Белгилей кетсек, тигүү тармагы үчүн 2022-жылдан бери бирдиктүү салык режими боюнча 0,25% өлчөмүндөгү жеңилдетилген ставка колдонулуп келет (башка категориялар үчүн накталай эсептешүүдө — 4%, накталай эмес эсептешүүдө — 2%). Ошондой эле экспорт учурунда документтерге жана маркировкага коюлган талаптар боюнча түшүндүрүү иштери жүргүзүлүүдө, — деп жыйынтыктады ал.
