Казакстанда кремний эритмелерин чыгаруучу ири завод ишке кирди
Караганда облусунда кремний эритмелерин чыгаруучу завод ишке киргенин tengrinews.kz сайты жазды. Жаңы ишкана кремний кластерин түзүү боюнча ири долбоордун биринчи этабы болуп саналат.
Бул кластер чийки затты казып алуудан жана электр энергиясын өндүрүүдөн тартып, жогорку технологиялуу тармактар үчүн материалдарды чыгарууга жана андан ары күн панелдерин өндүрүүгө чейинки циклди камтыйт.
"Казакстанда да, бүтүндөй Борбордук Азияда да учурда жогорку тазалыктагы кремний өндүрүлбөйт. Совет мезгилинде мындай өндүрүштөр Кыргызстанда болгон, бирок алардын кийинки тагдыры мага белгисиз. Караганда шаарында металлургиялык кремний чыгаруучу ишкана иштейт, бирок бул салыштырмалуу чакан көлөмдөр. Ошол эле учурда поликристаллдык жана монокристаллдык кремнийге болгон суроо-талап, айрыкча санариптик технологиялардын жана жасалма интеллекттин өнүгүшүнө байланыштуу, мындан ары да өсөт. Бул технологиялар барган сайын көбүрөөк электр энергиясын талап кылат. Ал эми бул көлөмдөрдү альтернативдүү энергия булактары аркылуу камсыз кылууга болот, алар үчүн жогорку тазалыктагы кремний зарыл", — деп түшүндүрдү жаңы заводдун жетекчиси Талгат Макаев.
Энергетикадан тышкары, кремний башка тармактарда да кеңири колдонулат: медицинада, тамак-аш өнөр жайында жана курулушта. Кремний кластери толук долбоордук кубаттуулукка чыкса, ар бир этапта ар кандай түрдөгү кремний өндүрүлүп, ал көп тармактарда талапка ээ болот. Мындан сырткары, долбоорду ишке ашыруу өзүнүн энергетикалык инфраструктурасын өнүктүрүүнү да камтыйт.
