Ишкерлер үчүн маалымкаттарды, уруксаттарды алуу процесстери жеңилдетилет
Кечээ Адылбек Касымалиев жергиликтүү телеканалдарга берген маегинде ишкерлер үчүн маалымкаттар менен уруксаттарды алуу процессин тездетүү боюнча көрүлүп жаткан чаралар тууралуу айтып берди.
Касымалиев белгилегендей, буга чейин айдоочулар ар кандай маалымкаттарды чогултуп, эки-үч мамлекеттик органга кайрылууга мажбур болуп, бул процесс бир жумага чейин созулчу. Азыр 100 күндүн ичинде процесс санариптештирилип, электрондук форматка өткөрүлдү. Натыйжада айдоочу эч жакка барбай, бардык документтерди бир жерден тапшырат, ал эми маалыматтар автоматтык түрдө чогултулуп, иштетилет. Маселе мурдагыдай бир күндө эмес, бир нече сааттын ичинде чечилет.
Экинчи багыт — курулуш тармагы. Буга чейин курулушка уруксат алуу процесси кээде жарым жылга, кээде бир жылга, ал тургай жылдарга чейин созулчу. Процесс талданып, өзгөртүүлөр киргизилгенден кийин ири курулуш долбоорлору 60 күндө, орточо долбоорлор 30 күндө, ал эми чакан долбоорлор, мисалы, жеке турак үй куруу, 20 күндүн ичинде макулдашылат.
Мындан тышкары, мурда ишкер арыз берип, анын кабыл алынышын бир нече күн күтүүгө аргасыз болчу. Эсептик эсепти же башка маалыматтарды өзгөрткөндө бул процесс кайрадан кайталанчу.
Азыр болсо мунун баарын салык төлөөчүнүн бирдиктүү кабинети аркылуу жасоого болот: системага кирип, арыз тапшырасың, бардык маселелер бир-эки сааттын ичинде чечилет.
