Кыргызстанда 4 жылда чакан жана орто ишкерликке 150 млн доллар каражат тартылган
Финансы министринин орун басары Нурбек Акжолов "Микро, чакан жана орто ишканаларды тез арада колдоо" долбоорунун жыйынтыгына арналган форумда чакан жана орто ишкердикти колдоо жана өнүктүрүү мамлекеттик экономикалык саясаттын негизги артыкчылыктарынын бири болуп кала берерин билдирди.
Ал микро, чакан жана орто ишкердикти тез арада колдоо долбоорунун алкагында өлкөгө Дүйнөлүк банктан жана Азия инфраструктуралык инвестициялар банкынан 150 млн доллар өлчөмүндө каражат тартылганын баса белгиледи. Каржылоо төрт жыл бою жүргүзүлүп, бул убакыттын ичинде республика боюнча 20 миңге жакын ишкер колдоого ээ болгон.
Аталган долбоор пандемиядан кийин миңдеген жумуш орундарын сактап калууга мүмкүндүк берген: каражат алгандардын 10 миңге жакынын аял ишкерлер түздү. Долбоордун бардык максаттуу көрсөткүчтөрү ишке ашырылып гана тим болбостон, пландан ашыгы менен аткарылган. Бул анын жогорку натыйжалуулугунан кабар берет.
Министрдин орун басары белгилегендей, долбоор эл аралык каржы институттары тарабынан жогорку баага татыды жана өлкөдөгү чакан жана орто бизнестин жигердүү өнүгүшүнүн аркасында белгиленген мөөнөттөн эрте аяктаган.
