РКӨФ Кыргызстандын кумшекер өндүрүү тармагына 25 млн доллар бөлөт
Россия–Кыргыз өнүктүрүү фонду (РКӨФ) Кыргызстандын кант тармагындагы айланма каражаттарды толуктоо үчүн "Кайыңды-Кант" ААКсына жана "Кошой" ААКсына 25 миллион АКШ долларын бөлөрүн фонддун басма сөз кызматы билдирди.
Бул колдоо кант заводдорун калыбына келтирүү жана модернизациялоо боюнча мурда башталган долбоорлордун уландысы болуп саналат. Тактап айтканда, 2016–2017-жылдары фонд "Каинды-Кант" жана "Кошой" заводдорун жаңылоого болжол менен 16 млн доллар каржылаган. РКӨФтүн баалоосуна ылайык, аталган эки ишкананын өндүрүштүк кубаттуулугу өлкөнүн кантка болгон муктаждыгын 100 пайыз камсыздоого мүмкүндүк берет.
"2016–2017-жылдары Россия–Кыргыз өнүктүрүү фонду “Каинды-Кант” жана “Кошой” аттуу эки кант заводун толук модернизациялоого болжол менен 16 миллион долларын бөлгөн. Бул заводдордун кубаттуулугу өлкөнүн кантка болгон керектөөсүн толугу менен камсыздай алат. Бүгүн биз 25 миллион доллар өлчөмүндөгү жаңы каржылоо тууралуу келишимге кол койдук. Бул каражаттар келерки жылы сатып алынуучу кант кызылчасынын көлөмүн көбөйтүүгө жана Кыргызстандын ички керектөөсүн толук жаба ала турган деңгээлде өндүрүштү арттырууга мүмкүндүк берет", — деп белгиледи РКӨФтүн башкармалыгынын төрагасы Артём Новиков.
Фонд ошондой эле бул колдоонун жумуш менен камсыз кылууга жана айыл чарба өндүрүүчүлөрүнө тийгизген оң таасирин белгиледи. Учурда заводдордо 1 500гө жакын адам иштейт, ал эми 3 500 фермердик чарба продукциясын туруктуу өткөрүү мүмкүнчүлүгүнө ээ. Жалпысынан алганда, РКӨФтүн маалыматына ылайык, Кыргызстан боюнча кант кызылчасын өстүрүү жана кайра иштетүү тармагында 100 миңге жакын адам эмгектенет.
