Түркиядан Кыргызстанга мыйзамсыз киргизиле турган алтын буюмдар кармалды
Өзбекстандын 15, Кыргызстандын 10 жаранынан турган трансулуттук уюшкан кылмыштуу топтун ишмердүүлүгүнө бөгөт коюлду. Ош облусунда аталган кылмыштуу топко көмөк көрсөтүп келген Мамлекеттик бажы кызматынын 2 кызматкери, ошондой эле УКИКга караштуу Мамлекеттик чек ара кызматынын 1 аскер кызматкери кармалды.
Текшерүүнүн жүрүшүндө Түркиядан Кыргызстанга кымбат баалуу медициналык дары-дармектерди жана зер буюмдарды контрабандалык жол менен системалуу түрдө алып кирип, аларды Ош облусунун аймагында сатуу, ошондой эле кийинчерээк бул товарларды Өзбекстанга мыйзамсыз алып чыгуу схемалары аныкталды.
Тактап айтканда, УКМКнын Ош облусу боюнча Чек ара кызматынын башкармалыгы жана Мамлекеттик бажы кызматынын "Ош" бажы бекети менен биргеликте "Стамбул – Ош" каттамындагы жүргүнчүлөрдүн жүгүн текшерүү учурунда Өзбекстан жана Кыргызстан жарандарынын айрымдарынан ири көлөмдөгү медициналык препараттар жана зер буюмдар табылган.
Экономикалык контрабанда фактысы боюнча козголгон кылмыш ишинин алкагында жүргүзүлгөн тергөө-ыкчам иш-чаралардын жыйынтыгында кылмыштуу топтун уюштуруучулары жана активдүү мүчөлөрү кармалып, Кыргыз Республикасынын УКМКнын тергөө абагына камакка алынды. Алардын ичинен 3өө Өзбекстандын жана 5өө Кыргызстандын жараны.
Аталган кылмыштуу топ 2025-жылдын ичинде Түркиядан 50дөн ашуун каттам жасап, контрабандалык жол менен 50 килограммдан ашык алтынды Кыргызстанга алып киргени аныкталды.
