Казакстан менен Япония 3,7 миллиард долларга 60 документке кол коюшту
"Борбордук Азия + Япония" бизнес-форумунун алкагында Казакстан менен Япония жалпы суммасы 3,7 миллиард доллардан ашкан 60тан ашуун документке кол койгонун Tengrinews.kz маалымдады.
Казакстан президенти Касым-Жомарт Токаевдин айтымында, Токиодо өткөн мындай маанилүү форум өлкө үчүн жана жалпы Борбордук Азия аймагы үчүн өзгөчө мааниге ээ окуя болуп саналат. Анын пикиринде, мындай саммиттер Борбордук Азиянын эл аралык субъекттүүлүгүнүн бекемделип жатканын жана дүйнөлүк процесстердеги ролунун жогору экенин көрсөтөт.
Касым-Жомарт Токаев Казакстан Япония менен биргелешкен долбоорлорду ийгиликтүү ишке ашыруу үчүн бардык зарыл шарттарды түзүүгө жана жагымдуу инвестициялык климатты камсыздоого даяр экенин билдирди.
"Соода-экономикалык жана инвестициялык байланыштарды активдештирүүгө өзгөчө көңүл буруу зарыл. Өткөн жылы эки тараптуу сооданын көлөмү болжол менен 2 млрд долларга жетти. Казакстан Япония рыногуна уран, сейрек кездешүүчү металлдар жана мунай экспорттойт. Япония республика экономикасынын негизги инвесторлорунун бири болуп, анын капиталдык салымдарынын көлөмү 8,5 миллиард доллардан ашты. Казакстан көп жылдардан бери ири жапон корпорациялары менен ийгиликтүү кызматташып келет жана өлкөдө жапондордун чакан жана орто бизнесинин ишмердүүлүгүн активдүү колдойт", — деди президент.
