Финансы министрлиги жыл жыйынтыгы менен Турукташтыруу фондуна 89,1 млрд сом которот
Финансы министрлиги 2025-жылдын жыйынтыгы боюнча Турукташтыруу фондуна 89,1 млрд сом которууну пландап жатат (Улуттук банктын расмий курсу боюнча 1 млрд доллардан ашык). Такталган баа 2025-жылга республикалык бюджетке өзгөртүүлөрдү киргизүү боюнча мыйзам долбооруна тиркелген түшүндүрмө катта келтирилген.
Мыйзам долбооруна тиркелген 2-тиркемеге ылайык, бул каражаттар экономикалык классификация боюнча республикалык бюджеттин чыгашалары катары эсепке алынат. Баштапкы бекитилген трансферттин көлөмү 10 млрд сомду түзгөн. Финансы министрлигинин маалыматына ылайык, фонддун каражаттары социалдык-экономикалык өнүгүүнү камсыздоого багытталат.
Турукташтыруу фонду 2022-жылдын март айында түзүлгөн жана андан бери 2025-жылга карата Финансы министрлигинин жаңыртылган баасын эске алганда республикалык бюджеттен фондго которулган каражаттардын жалпы көлөмү 110 млрд сомго жеткен.
Ал эми 2026-жылы Финансы министрлиги республикалык бюджеттин долбооруна ылайык, бул фондго 50 млрд сом которууну пландап жатат.
