Б.Төрөбаев: "Теке Секирик" долбоорун долбоорлочу уюм табылбай келет"
Бүгүн Жогорку Кеңештин пленардык жыйынында депутат Ырысбек Атажанов МинКаб орун басарына Баткен облусунда ишке ашырылып жаткан "Теке Секирик" долбоору тууралуу суроо узатты.
МинКаб төрагасынын орун басары Бакыт Төрөбаев учурда долбоор боюнча техникалык-экономикалык эсеп (ТЭЭ) даярдалганын билдирди.
"Бул жерде сөз бир гана суу сактагыч тууралуу эмес, гидроэлектр станциясын (ГЭС) куруу маселеси да бар. Бул максатта 16 миң гектар жерди пайдаланууну көздөп жатабыз", — деп тактады ал.
Торобаевдин айтымында, долбоорду иштеп чыгууга 50 млн сом каралган. Бирок буга чейин мындай ири объектти долбоорлоочу уюмду табуу мүмкүн болбой келет.
Суу ресурстары кызматынын маалыматына ылайык, Баткен облусун өнүктүрүүгө багытталган "Теке Секирик" долбоору жаңы жерлерди өздөштүрүүгө жана жумуш орундарын түзүүгө багытталган. Бул — ирригациялык каналдарды, ГЭСти жана суу сактагычты камтыган гидротехникалык объекттердин тармагын курууну көздөгөн инфраструктуралык долбоор.
Алдын ала эсептөөлөр боюнча, долбоорду ишке ашырууга 30 млрд сомго жакын каражат талап кылынат. Учурда долбоордук документация иштелип жатат.
