Быйыл маданият тармагындагы инфраструктураны жаңылоого бюджеттен 465 млн сом бөлүнгөн
2025-жылы маданият тармагындагы ири долбоорлор инфраструктураны жаңылоого, маданият жана искусство мекемелерин өнүктүрүүгө, ошондой эле алардын материалдык-техникалык базасын жакшыртууга багытталганын Жогорку Кеңештин жыйынында Министрлер Кабинетинин төрагасы Адылбек Касымалиев билдирди.
2025-жылы маданий мекемелердин материалдык-техникалык базасын модернизациялоого бюджеттен 465 млн сом бөлүнгөн. Ал эми 2024-жылы бул максатка 952 млн сом каражат багытталган.
Мындан тышкары, жыл ичинде маданий мекемелердин имараттарын капиталдык оңдоо жана калыбына келтирүү иштери жүргүзүлгөн. 2024-жылы бул иштерге 273 млн сом, ал эми 2025-жылы 208 млн сом бөлүнгөн.
Ишке ашырылган жана улантылып жаткан негизги долбоорлордун катарына төмөнкүлөр кирет:
- Б. Бейшеналиева атындагы Кыргыз улуттук маданият жана искусство университетинин жаңы окуу корпусун куруу — 990 млн сом;
- М. Күрөңкеев атындагы Кыргыз улуттук музыкалык окуу жайынын жаңы имаратын куруу — 750 млн сом.
2025-жылы аймактардагы маданий инфраструктураны өнүктүрүүгө өзгөчө көңүл бурулду. Манас шаарында:
- 3200 орундуу заманбап филармониянын курулушу жүрүп жатат, долбоордун баасы 1 млрд сомду түзөт;
- заманбап шаардык музейди түзүү иши башталып, ага 250 млн сом каражат багытталган.
