Пенсияларды жогорулатууга 2026-жылга 1 млрд сом каралды
Кыргызстанда 2026-жылы пенсияларды 7 пайызга жогорулатуу пландалып жатканын Социалдык фонддун төрагасы Бактияр Алиев билдирди. Анын айтымында, бул максатка 2026-жылга карата Социалдык фонддун бюджетинен 1 миллиард 200 миллион сом каралган.
"Биз пенсияларды 7%га жогорулатууну пландадык. Кийинки жылы камсыздандыруу төгүмдөрүнөн түшкөн кирешелерге талдоо жүргүзөбүз. Эгерде биринчи жарым жылдыкта кирешелер өссө, пенсияларды дагы көбүрөөк көтөрүүгө аракет кылабыз", — деди Соцфонддун жетекчиси.
Бактияр Алиев депутаттарга "Кыргыз Республикасынын Социалдык фондунун 2026-жылга жана 2027–2028-жылдарга карата пландуу мезгилге бюджети жөнүндө" мыйзам долбоорун тааныштырды.
Анын маалыматына ылайык, Социалдык фонддун 2026-жылга карата бюджетинин кирешелери 137 миллиард 691 миллион 504 миң 700 сомду түзөт. Анын ичинде:
- камсыздандыруу төгүмдөрүнөн түшүүлөр — 88 миллиард 100 миллион сом;
- республикалык бюджеттен бөлүнгөн ассигнациялар — 46 миллиард 670 миллион 347 миң 300 сом;
- башка кирешелер — 2 миллиард 921 миллион 157 миң 500 сом.
Ал эми Социалдык фонддун 2026-жылга карата чыгашалары 137 миллиард 303 миллион 365 миң 200 сомөлчөмүндө пландалып жатат.
