Элдик курултайда Майлуу-Суудагы лампа заводун жандандыруу керектиги айтылды
IV Элдик курултайдын делегаты, Майсуу-Суу шаарынын тургуну Абдулахап Нуралиев 61 жылдан бери иштеп келе жаткан "Майлуу-Суу" лампа заводу учурда туруктуу иштебей жаткандыктан президент заводдун ишин көзөмөлгө алуусун суранды.
Анын айтымында, кытай өндүрүшүнөн чыккан диоддук лампаларга суроо-талап жогор болгондуктан электр лампаларын калк көп сатып албайт.
"Завод туруктуу иштебей жаткандыктан, шаар бюджетине салык түшпөй, шаарыбыздын өнүгүшүнө тоскоолдуктар жаралып жатат. Кесипкөй адистер жана жаштар шаардан тышкары иш издөөгө кетип калышууда. Ошондуктан заводдун ишин жандандыруу керек”, - деди делегат.
Ошондой эле Абдулахап Нуралиев өлкө башчысынан шаардагы социалдык объекттерди оңдоп-түзөөгө жана инфраструктураларды жакшыртууга каражат бөлүп берүүнү айтты.
Мындан тышкары делегат шаарга чакан ГЭС куруу зарылдыгын белгиледи.
“Шаарыбыздын аймагында чакан ГЭС курганга жер бар. Долбоор да даяр. Эгер ГЭС курулуп калса, Майсуу-Суу шаары жана Ноокен району электр энергиясы менен туруктуу камсыздалмак”, -дейт ал.
Ошол эле маалда делегат шаарда дарыгерлердин жетишсиздиги да олуттуу маселе экенин айтып, медицина кызматкерлери менен камсыздоо, жаш адистерди аймакка жиберүүнү да көңүл сыртында калтырбоону кошумчалады.
