Өлкөдө 500 кВ электр линиясын куруу үчүн 67,7 млн евро инвестиция тартылат
Жогорку Кеңештин Өнөр жай саясаты, транспорт, отун-энергетикалык комплекс, архитектура жана курулуш боюнча комитетинин кезексиз жыйынында "Кемин" подстанциясы менен жаңы "Балыкчы" подстанциясынын ортосундагы 500 кВ электр өткөрүү линиясы курууга байланыштуу стратегиялык долбоор каралып, жактырылды. Бул тууралуу парламенттен билдиришти.
Долбоорду энергетика министринин орун басары Эмилбек Ысманов тааныштырды. Анын маалыматына ылайык, Европа реконструкциялоо жана өнүктүрүү банкы (ЕРӨБ) менен түзүлгөн макулдашуунун жалпы суммасы 67,7 млн евро түзөт:
- 61,7 млн евро — кредит (20 жылдык мөөнөткө, 5 жылдык жеңилдетилген мезгил, жылдык пайыз 1%);
- 3 млн евро — грант;
- 3 млн евро — техникалык жардам катары берилүүчү грант.
Жыйында депутаттар бир катар орчундуу маселелерди көтөрүштү. Депутат Кундузбек Сулайманов курулуштун бүткөн мөөнөтүн тактады. Баяндамачы иштер 2028-жылдын аягына чейин бүтүрүлөрүн билдирди. Депутат Гуля Кожокулова калктын электр энергиясына болгон чектөөлөрдөн кабатыр экенин белгиледи. Министрдин орун басары Кыргызстан алдыдагы 3 жылда энергетикалык кризистен толук чыгарын убада кылды. Депутат Темирлан Айтиев кредиттик келишимдеги Euribor рыноктук пайыздык ченинин шарттарына кызыкдар экенин билдирди.
Белгилей кетсек, бул долбоор өлкөнүн түндүк аймагын электр энергиясы менен ишенимдүү камсыздоого жана энергетикалык коопсуздукту чыңдоого багытталган.
