"Кыргызалтын" Кызыл-Омполду өз күчү менен иштетүүнү көздөп жатат
Жаратылыш ресурстары, экология жана кайра иштетүү министри Медер Машиев Tazabek басылмасына Кызыл-Омпол кенин иштетүү иштери кайсы этапта экенин айтып берди. Министрдин айтымында, "Кыргызалтын" Кызыл-Омполдо өндүрүштү өз күчү менен уюштурууну пландап жатат.
"Өндүрүштүн биринчи этабы — титаномагнетитти жана руданы бөлүү. Руда эки бөлүккө ажыратылат: бир бөлүгү — титаномагнетит, экинчиси — комплекстүү руда. Ал жерде башка коштоочу пайдалуу кендер да бар. Бул эки компонент эки башка өндүрүштө кайра иштетилет. Комплекстүү руда Кара-Балта тоо-кен комбинатында кайра иштетилет", — деп түшүндүрдү министр.
Машиев ошондой эле титанды темирден ажыратуу үчүн жаңы өндүрүш куруу зарылдыгын кошумчалады.
"Так ушул өндүрүш боюнча “Кыргызалтын” өнөктөштөр менен сүйлөшүүлөрдү жүргүзүп жатат. Алар алдыңкы технологияларды изилдеп, ар түрдүү компаниялардын өкүлдөрү менен жолугушууларды өткөрүп жатат", — деп жыйынтыктады министр.
