Бозо, жарма, максымга 2027-жылдан тарта акциздик маркалар киргизилет
МинКабдын "Кыргыз Республикасынын Салык кодексинин 336- жана 345-беренелеринин талаптарын ишке ашыруу боюнча чаралар жөнүндө" токтомунда Кыргыз Республикасынын аймагында өндүрүлгөн жана республика аймагына импорттолгон айрым акциздик товарларга карата акциз салыгынын ставкалары келтирилген.
Документте 2027-жылдын 1-январынан тартып акциздик жыйымдын маркасы менен улуттук суусундуктарда милдеттүү түрдө маркалоого тийиш экени көрсөтүлгөн. Аларга:
- бозо,
- максым,
- жарма
кирет жана бул суусундуктар:
- КМС 891:2003 "Бозо суусундугу. Техникалык шарттар",
- КМС 980:2021 "Улуттук суусундуктар “Максым” жана “Жарма”. Техникалык шарттар" стандарттарына ылайык өндүрүлүп, ТН ВЭД(тышкы экономикалык ишмердүүлүктүн товардык номенклатурасы) 2202 товардык позициясы боюнча классификацияланат.
Маркаланбаган акциздик товарлардын калдыктарын жүгүртүүгө маркалоо киргизилген күндөн тартып 6 ай өткөндөн кийин тыюу салынат.
Мындан төмөнкү товарлар өзгөчө болуп саналат:
кант же башка таттуулагычтарды же даам берүүчү заттарды камтыган, анын ичинде минералдык жана газдалган суулар (ТН ВЭД 2202). Бул товарлар боюнча маркаланбаган калдыктарды жүгүртүүгө тыюу салуу мөөнөтү 2025-жылдын 1-январынан тартып күчүнө кирет.
Акциз салыгынын ставкалары суусундуктар боюнча:
- Улуттук суусундуктар (бозо, максым, жарма) — 1 литрине 0 сом
- Кант же башка кошумчалары бар минералдык жана газдалган суулар — 1 литрине 3 сом
- Энергетикалык алкоголсуз суусундуктар — 1 литрине 6 сом
Ликёр-арак продукцияларынын, күчөтүлгөн суусундуктардын, ширелердин жана бальзамдардын 1 литрине карата акциз салыгы алардагы этил спиртинин көлөмүнө жараша кайра эсептелет. Негизги ставка спирттин көлөмү 40% болгон продукция үчүн колдонулат.
