Өзбекстандын тышкы карызы 75,4 млрд долларга жетти
2025-жылдын 1-октябрына карата Өзбекстандын жалпы тышкы карызы 75,4 млрд долларга жеткенин өлкөнүн Борбордук банкы билдиргенин "Кабар" агенттиги жазды. Маалыматка ылайык, жылдын тогуз айында мамлекеттик тышкы карыз 10%га, ал эми ишканалардын тышкы карызы дээрлик 27%га көбөйгөн.
2025-жылдын январь–сентябрь айларында өлкөнүн тышкы карызы жалпы 11,3 млрд долларга өстү. Октябрдын башына карата мамлекеттик тышкы карыз 1-январдагы 33,7 млрд доллардан 37,4 млрд долларга жетти. Ал эми ишканалардын тышкы карызы ушул мезгил ичинде 30,2 млрд доллардан 38 млрд долларга чейин көбөйгөн.
Жыл башында өкмөт жана компаниялар чет мамлекеттерден, эл аралык каржы уюмдарынан жана жеке инвесторлордон алган тышкы каражаттардын көлөмү 64,1 млрд долларды түзгөн.
Эл аралык рейтингдик агенттиктер менен Дүйнөлүк банк Өзбекстандын тышкы карыз деңгээлин орточо деп баалап келет. Ошол эле учурда тартылган каражаттардын олуттуу бөлүгү жеңилдетилген шарттарда алынганы белгиленет.
Маалыматта ишканалардын тышкы карызынын 40–50%ы мамлекеттик компанияларга туура келери, калганы жеке секторго тиешелүү экени белгиленет.
