Кыргыз асыл тукум мамлекеттик заводунда силос даярдоо күчөтүлдү
Мамлекеттин колдоосу менен Кыргыз асыл тукум мамлекеттик заводунун чарбасы акыркы жылдары жанданып, өндүрүштүк ишмердүүлүгү кеңейүүдө. Чарбанын базасында машина-трактордук станция түзүлүп, айыл чарба иштерин өз күчү менен жүргүзүү мүмкүнчүлүгү камсыздалган.
Анын алкагында жергиликтүү жүгөрүнүн "Ала-Тоо" сорту өстүрүлүп, ар бир гектар жерден 40–50 тоннага чейин сапаттуу силос алынып жатат. Алынган силос тоют катары колдонууга чейин заманбап талаптарга ылайык даярдалууда.
Маалымат үчүн белгилесек, силостун бир боосунун салмагы 75 килограммдан 90 килограммга чейин жетет. Учурда чарбада жалпы көлөмү 500 тоннага чейин даяр силос запасы топтолгон.
Бул жетишкендиктер буга чейин жетиштүү деңгээлде көңүл бурулбай келген чарбаларды мамлекеттик колдоо аркылуу жандандыруунун айкын жыйынтыгын көрсөтүп, иштин үзүрү көрүнө баштаганын тастыктайт.
Ошону менен катар, мамлекеттин асыл тукум мал чарбасында сандан сапатка өтүү саясатынын алкагында малды тоюттандыруу базасын чыңдоо иштери жүргүзүлүүдө. Акыркы мезгилде эл арасында кеңири жайылып жаткан чыктуу тоют жогорку сиңимдүүлүгү жана азыктуулугу менен айырмаланып, башка тоют түрлөрүнө салыштырмалуу малды натыйжалуу багууга ыңгайлуу шарт түзүүдө.
