VI Дүйнөлүк көчмөндөр оюндарына 500 млн сом жумшалат
VI Дүйнөлүк көчмөндөр оюндарынын ачылышы жана жабылышы 1–6-сентябрь күндөрү борбор калаадагы жаңы "Бишкек-Арена" стадионунда өтөт. Бул процессти президент өзү көзөмөлдөп жатат, жумушчу топту Президенттин иш башкаруучусу Каныбек Туманбаев жетектейт. Бул тууралуу АКИpress агенттигине берген маегинде Маданият министри Мирбек Мамбеталиев билдирген.
"Биз дээрлик ар эки жума сайын чогулуп, талкуулап, жыйын өткөрүп турабыз. Көчмөндөр оюндарынын ачылышы ШКУнун саммитине жана Кыргызстандын Эгемендүүлүк күнүнө туш келип жатат. Ошондуктан бул иш-чарага өзгөчө чоң көңүл бурулууда", — деди маданият министри.
Мамбеталиевдин айтымында, Маданият министрлиги тарабынан Көчмөндөр оюндарын өткөрүүгө 500 млн сомдон ашуун каражат сарптоо пландалган.
"Көчмөндөр оюндары салтка ылайык Ысык-Көлдө өтөт. Адаттагыдай эле этношаарча курулат, ат чабыш майданында ат спорту оюндары уюштурулат. Мындан тышкары, Өрнөк айылындагы Көчмөн цивилизациясы борборун да пайдаланууну каалап жатабыз, “Рух Ордо” маданий борбору да тартылат", — деп кошумчалады министр.
