Экожолдорду жана экотуризмди өнүктүрүү жөнгө салынат
Экологиялык жол жана экотуризмди өнүктүрүү мамлекеттик жөнгө салууну талап кыларын радионун түз эфиринде Туризмди колдоо жана өнүктүрүү фондунун директору Адилет Жанузаков билдирди.
Анын айтымында, бул маселеге мамлекеттик саясаттын көз карашынан мамиле кылуу зарыл. Ушуга байланыштуу Туризмди колдоо жана өнүктүрүү фонду Туризм департаменти жана Экономика министрлиги менен биргеликте тиешелүү сунуштарды даярдоону пландоодо. Ошол эле учурда, Жанузаков белгилегендей, чечимдерди иштеп чыгуунун алдында статистикалык маалыматтарды чогултуу жана талдоо, ошондой эле туроператорлордун рыноктогу учурдагы абал жана тенденциялар боюнча пикирлерин эске алуу каралууда.
Жанузаков ошондой эле экологялык жол туризмди өнүктүрүүнүн актуалдуу багыты бойдон кала берерин билдирди. Фонд буга чейин экожолдорду электрондук карталарга түшүрүү боюнча иштерди жүргүзгөн, анын ичинде туристтер маршруттарды мобилдик колдонмолор аркылуу оңой таба алышы үчүн 2ГИС сервисин колдонгон.
Ошол эле учурда, анын айтымында, глэмпингди жана экотуризмди өнүктүрүү жаратылышка аяр мамиле кылуу менен коштолууга тийиш. Ал белгилегендей, "жапайы" туризм шарттарында да минималдуу инфраструктураны түзүү, анын ичинде биотуалеттерди орнотуу жана башка негизги шарттарды камсыз кылуу зарыл, анткени бул айлана-чөйрөнүн сакталышына түздөн-түз таасир этет.
Мындан тышкары, Фонд туроператорлор жана турагенттиктер менен биргеликте туристтердин жүрүү маршруттарын аныктоо маселелерин иштеп чыгууда. Бул туристтердин кыймылы тоолуу аймактарда башаламан эмес, так белгиленген багыттар боюнча жүрүшү үчүн керек.
