Пандемиялардан коргонууга жана азык-түлүк коопсуздугун чыңдоого 30 млн доллар бөлүнөт
Кыргызстан "Бирдиктүү саламаттык" программасынын алкагындагы "Кыргызстан үчүн 1-фаза" долбоору боюнча пандемиялардан коргонууга жана азык-түлүк коопсуздугун бекемдөөгө 30 млн доллардан ашык каражат алат. Бул тууралуу Жогорку Кеңештин агрардык саясат, суу ресурстары, жер казынасын пайдалануу, экология жана айлана-чөйрөнү коргоо боюнча комитетинин жыйынында маалымдалды.
Суу ресурстары, айыл чарба жана кайра иштетүү өнөр жайы министринин биринчи орун басары Жаныбек Керималиевдин айтымында, долбоор Дүйнөлүк банктын глобалдык демилгесинин бир бөлүгү болуп саналат. Долбоордун жалпы бюджети 30,79 миллион долларды түзөт.
Аталган долбоордун алкагында бул иштер аткарылат:
- эки жаңы ветеринардык лабораторияны куруу жана алты иштеп жаткан лабораторияны модернизациялоо;
- эки мобилдик лаборатория сатып алуу;
- 78 жергиликтүү ветеринардык-санитардык лабораторияны жаңылоо;
- 40 чек арадагы ветеринардык көзөмөл пунктун жабдуу;
- 44 райондук жана шаардык ветеринардык кызматты муздаткыч жабдуулар менен камсыз кылуу;
- техникалык жактан камсыздоо: 1 607 даана ветеринардык жабдуу алуу;
- бруцеллёзго каршы 875 миңден ашык ири мүйүздүү малды жана 5 миллиондон ашык майда мүйүздүү малды эмдөө жана башка иш-чаралар.
Жаныбек Керималиев белгилегендей, долбоорду ишке ашыруу үчүн мамлекеттик бюджеттен кошумча каражат талап кылынбайт. Ал эч кандай терс кесепеттерди жаратпайт жана Кыргызстандын мыйзамдарына, ошондой эле эл аралык нормаларга толук шайкеш келет.
