Тоголок алтын кенине тоо-кен техникалары жеткирилди
"Кумтор Оперейтинг Компани" ЖАКы иштеп жаткан Тоголок алтын кенине атайын оор тоо-кен техникасынын кезектеги партиясы жеткирилди.
Компаниядан билдиришкендей, жеткирилген техника кенди өздөштүрүү боюнча иштердин толук комплексин жүргүзүүгө арналган. Тоголок кени Кыргызстандагы тоо-кен тармагы үчүн стратегиялык мааниге ээ долбоорлордун бири катары бааланат.
Учурда кенде пайдаланууга даяр төмөнкү техникалар бар: Shacman маркасындагы төрт самосвал, "НефАЗ" маркасындагы эки вахталык автобус, эки фронталдык жүктөгүч, эки бульдозер, автогрейдер жана экскаваторлор.
Белгиленгендей, жакынкы аралыкта Тоголок кенине кошумча карьердик техникаларды, анын ичинде экскаваторлорду, самосвалдарды жана жүктөгүчтөрдү жеткирүү пландалууда.
Компанияда заманбап техниканы колдонуу өндүрүш процесстеринин натыйжалуулугун жогорулатып, алтын казууда өнөр жай коопсуздугунун талаптарын сактоону камсыз кыларын белгилешет. Ошол эле учурда кенде инфраструктуралык объекттерди куруу жана казып алуу иштерин баштоого даярдык көрүү улантылып жатат.
Тоголок — Кыргызстандын Ысык-Көл облусунун Жети-Өгүз районунда жайгашкан алтын кен. Ал деңиз деңгээлинен болжол менен 3,6–3,9 миң метр бийиктиктеги тоолуу аймакта орун алган. Алдын ала баалоолор боюнча алтындын ресурстары 17–20 тоннага чейин жетет. Кен 1978-жылы ачылган.
