Дүйнө жүзүндө тышкы колдоосуз карыздарын төлөй албаган "зомби компаниялар" көбөйдү
Евразия өнүктүрүү банкынын (ЕӨБ) изилдөөсүндө айтылгандай, дүйнөлүк экономика акыркы 10 жыл бою жүргүзүлгөн өтө жумшак акча-кредит саясатынын мезгилинен кийин пайыздык чендердин "кадимки" деңгээлине кайра кайтты.
Дүйнөдө пайыздык чендердин туруктуу жогорулашынын кесепеттеринин бири — корпорациялардын каржылык алсыздыгынын күчөшү болду.
"Эгер 2019–2020-жылдары компаниялар еврозонада 1,5–2%, ал эми АКШда жылына 2–3% менен насыя тарта алышса, 2024-жылы кайра каржылоо эки экономикада тең 5–6%дык чендер менен жүргүзүлдү.
Расмий түрдө иштеп жаткан, бирок тышкы колдоосуз карыздарын тейлей албаган "зомби-компаниялардын" саны көбөйдү", — деп белгилешет аналитиктер.
Баалоолорго ылайык, жогорку пайыздык чендердин узакка созулган мезгили каржылык туруксуздук тобокелдиктерин күчөтөт. Карыздарды ири масштабда кайра түзүү (реструктуризациялоо) сөзсүз болот: корпоративдик милдеттенмелерди кайра каржылоонун эң жогорку чеги 2027–2028-жылдарга туура келип, алар 2025–2026-жылдардагы суверендүү карыздарды кайра каржылоо жогорку чегинен кийин башталат.
"Зомби-компаниялардын” санынын өсүшү жана көпчүлүк өлкөлөрдө бюджеттик консолидациянын зарылдыгы инвестициялык мүмкүнчүлүктөрдү чектеп, дүйнөлүк экономикалык өсүштүн жайлашын жогорулатат", — деп божомолдошот изилдөөнүн авторлору.
