Тамактын порциясын азайтып, бааны көтөргөн кафе, ресторандарга айып пул салынат
2026-жылдын 1-январынан тартып Кыргызстанда коомдук тамактануу жайларында, анын ичинде кафе жана ресторандарда, кызмат көрсөтүү акысын алууга тыюу салган токтом күчүнө кирди.
Антимонополиялык жөнгө салуу кызматы билдиргендей, бул норма күчүнө киргенден кийин айрым жайлардын ээлери кызмат көрсөтүү акысын формалдуу түрдө жойгон менен, аны тамак-аштын баасына кошуп жиберген учурлар аныкталды. Мындай аракеттер мыйзам бузуу катары бааланат.
Токтомдун аткарылышын көзөмөлдөө Антимонополиялык жөнгө салуу кызматына жана Мамлекеттик салык кызматына жүктөлгөн. Эрежелерди бузган ишкерлерге айып пул салынат.
Тактап айтканда, товарды кем салмакта берүү, порциянын көлөмүн азайтуу же керектөөчүнү алдоо үчүн жеке адамдарга 16 миң 500 сом, ал эми юридикалык жактарга 51 миң сом өлчөмүндө айып пул каралган.
Товарды көрсөтүлгөн баадан жогору саткан учурда жеке адамдарга 30 миң сом, юридикалык жактарга 15 миң сом айып пул салынат. Улуттук валютада баа көрсөтмөлөрүнүн жоктугу үчүн да ушундай эле айып пулдар каралган.
